М. Е.Николаевка аналлаах өй оонньуу-күрэҕэ буолан ааста

Дьокуускай куорат саха тылын уонна литературатын учууталларын «Тыыннаах тыл» бырайыагын чэрчитинэн, А. Г. уонна Н. К. Чиряевтар ааттарынан Дьокуускай куорат национальнай гимназиятыгар муус устар 21 күнүгэр маҥнайгы президеммит М. Е. Николаев сырдык олоҕун, айымньылаах үлэтин билиһиннэрэр, көрдөрөр-иһитиннэрэр, улахан иитэр-үөрэтэр суолталаах өй оонньуу-күрэҕэ буолан ааста.

Тэрийээччи - А. Г. уонна Н. К. Чиряевтар ааттарынан Дьокуускай куораттааҕы национальнай гимназия саха тылын, литературатын уонна культуратын кафедрата. Барыта сахалыы тыллаах 4 оскуола (Саха гимназията, Саха политехническэй лицей, Дьокуускай куорат 7-с нүөмэрдээх орто оскуолата, Дьокуускай куорат национальнай гимназията) онус кылааһын оҕолоро 4 хомуур хамаанда буолан, билиилэрин тургуттулар, кыайыылаах үрдүк аатын ылан, хайҕал суруктарынан наҕараадаланнылар. Өй оонньуу-күрэх гимназия 10 «а» кылааһын уолаттарын өрөспүүбүлүкэ, Сахабыт сирин туһунан дойдунаат эҕэрдэ хоһооннорунан саҕаламмыта тоҕоостоох буолла. Өктөмнөөҕү М. Е. Николаев киинин бэлэмнээн таһаарбыт документальнай киинэтин оҕолор олус болҕойон, киэн тутта көрбүттэрэ-истибиттэрэ саарбаҕа суох. Гимназия туох баар онус кылааһын оҕолоро, эмиэ кыттааччылар курдук, өй күрэх-оонньууну тэҥҥэ көрөн, билбэтэхтэрин билэн, билиилэрин хаҥатан, астыммыттара-дуоһуйбуттара кинилэр үөрбүт-көппүт дьүһүннэриттэн, астыммыт-махтаммыт харахтарыттан, хас биирдии сөптөөх хоруй, хамаанданы уруйдуур-айхаллыыр ытыс дохсун тыаһа доҕуһуоллаах ааһарыттан өтө көстөрө. 

Дьокуускай куорат уокуругун дьаһалтатын үөрэххэ салалтатын сыллааҕы былааныгар эрдэттэн торумнанан киирэн ыытыллыбыт тэрээһиҥҥэ оҕолору салайан илдьэ кэлбит учууталлар махтал суруктарынан биһирэммиттэрэ.

Төһө даҕаны бэйэ-бэйэлэрин кытта ити эрэ күн билсэн, кэпсэтэн, биир хамаанда буолан, ааттанан, бас киһилэнэн, биир өйгө-санааҕа түмүллүбүттэрэ, алтыспыттара оҕолорго олохторун биир умнуллубат кэрэ бэлиэ түгэнинэн буолара биллэр суол. 

Сүдү дьоммут олохторо, сүҥкэн суолталаах үлэлэрэ үүнэр сүһүөх ыччакка өйдөрүгэр-сүрэхтэригэр бэйэ норуотунан киэн туттууну, киниэхэ муҥура суох тапталы, ытыктабылы иҥэрэрэ маннык суолталаах тэрээһиннэртэн арылхайдык көстөр.

Дьокуускай куораттааҕы национальнай гимназия саха тылын, литературатын уонна культуратын кафедрата.